Jobs Victoria
اگه شیمو ده ویکتوریا بلده کار می گیردین، مرکزکاریابی ویکتوریا می تنه شموره کمک کنه.
بلده کار میگیردید؟ د مرکز آنلاین جابز ویکتوریا بلده کار گشته و درخواست بدید.
مرکز آنلاین ازمو یک خدمت مفت استه که شیمو می تنید د اونجی بلده کار گشته و درخواست بدید.
امیالی جستجو کید
کار د نزدیکای خو پیدا کید.
بلده درخواست ددون کار ثبت نام کید
بلده درخواست ددون کار د مرکز آنلاین، باید ثبت نام کیده باشید. ای یک کار آسو استه که د اونجی شیمو باید مشخصات ابتدائی شخصی و تماس خوره مهیا کنید.
اعلانای کاری ره دریافت کید
بادازیکه در مرکز آنلاین ثبت نام کدید، اعلان کارایکه مطابق علاقه و موقعیت شیم استه دریافت خاد کدید.
آیا مه مستحق استم؟
مرکز آنلاین جابز ویکتوریا بلده تمام نفرایی که بلده کار میگیرده به شمول شاگردای بین المللی مفت و د دسترس استه.
مالومات غدرتر د باره مرکز آنلاین
چه رقم کارا ره می تنم از مرکز آنلاین پیدا کنوم؟
تمام رقم کارا ره، از مرحله شروع تا موقعیتای بالا تا کارآموزی های با تنخاه. کارای مختلف د صنعتای رقم رقم به شمول کار ساختمانی، مهمان نوازی، کمک معیوبین، پارک و سرگرمی، دولتی، منابع انسانی، صحت، ترانسپورت، موی و آرایش، بازاریابی و برنامه ها، پرچون فروشی، تکنالوجی معلوماتی، موتر، فروش و چیزای زیاد دیگه.
آیا بلده جستجو کدون کار باید ثبت نام کنوم؟
هر کس می تنه د مرکز آنلاین بلده کار جستجو کنه. بلده درخواست ددون یک کار، باید خود خوره ثبت نام کنید.
آیا می تنوم د گوشی موبائل خو بلده کار توغ کنوم؟
بله، قد برنامه Sidekicker شیمو می تنید داخل مرکز آنلاین شده و د گوشی موبائل خو بلده کار جستجو کنید.
وقتی که ثبت نام کدم چیز کار موشه؟
- حساب مرکز آنلاین شیم جور موشه. هر وقت می تنید داخل حساب خو شده بلده کار توغ کیده و درخواست بدید و پروفایل خوره تازه کنید.
- شیمو اعلانای کار از طریق ایمیل که مطابق موقعیت و علاقه شیم استه دریافت خاد کدید.
پروفایل ازمه چیز استه و آیا مه اوره تازه کده می تنوم؟
حساب مرکز آنلاین شیم شامل پروفایل شخصی شیم موشه که وقتایی که شیمو بلده کار درخواست می دید صاحیب کارا مینگیرنه. پروفایل شیم رقم یک خلص سوانح آنلاین استه. شیمو می تنید مشخصات خود خوره و تجربه کاری خوره درشی نوشته کنید.
آیا وقتایی که کارای نو اعلان موشه مه ره خبر مونه؟
بله. بادازیکه شیمو د مرکز آنلاین خود خوره ثبت نام کدید، ازو باد هر وقت که کار اعلان شد بلده شیم اعلانا از طریق ایمیل مه یه. اگه برنامه Sidekicker ره نصب کنید می تنید که اعلانایی کاری ره مستقیم د گوشی موبائل خو دریافت کنید.
جابز ویکتوریا بدله نفرایی که بلده کار می گیردن دیگه چی رقم کمکا دیره؟
جابز ویکتوریا د ویکتوریا یهای ره که بلده کار میگیردن به کمک تیم مدافعا، مربی ها و مشاورین کاری خو کمکای که مطابق ضرورت شی باشن مهیا مونه.
از کجا می تنوم کمکای تخنیکی بدست بیروم؟
اگه قد مرکز آنلاین اگو مشکلات تخنیکی درید، لطفاً اینجی تماس بیگرید:
support@sidekicker.com.auیا 1800 967 909
اگه قد استفاده مرکز آنلاین کمک د کار درید، لطف کیده خط کمکی جابز ویکتوریا ره د شماره 1300 208 575 زنگ دید.