Jobs Victoria
ܐܸܢ ܐܲܚܬܘܿܢ ܛܲܥܘܼܝܹܐ ܝܬܘܿܢ ܒܵܬ݇ܪ ܦܘܼܠܚܵܢܵܐ ܓܵܘ ܒ݂ܝܼܟܬܘܿܪܝܵܐ، Jobs Victoria ܡܵܨܹܐ ܕܗܲܝܸܪܵܘܟ݂ܘܿܢ.
ܛܲܥܘܼܝܹܐ ܝܬܘܿܢ ܒܵܬ݇ܪ ܫܘܼܓ݂ܠܵܐ؟ ܛܲܥܹܝܡܘܼܢ ܒܵܬ݇ܪ ܘܛܠܘܿܒܘܼܢ ܫܘܼܓ݂ܠܵܢܹ̈ܐ ܒܐܘܼܪܚܵܐ ܕܩܸܢܛܪܘܿܢ ܕ Jobs Victoria ܥܲܠ ܐܸܢܬܸܪܢܹܝܬ.
ܩܸܢܛܪܘܿܢܲܢ ܥܲܠ ܐܸܢܬܸܪܢܹܝܬ (online hub) ܝܼܠܵܗ̇ ܚܕܵܐ ܚܸܠܡܲܬ ܡܲܓܵܢܵܝܬܵܐ ܐܲܝܟܵܐ ܕܡܵܨܝܼܬܘܿܢ ܕܛܵܥܝܼܬܘܿܢ ܒܵܬ݇ܪ ܘܛܵܠܒܝܼܬܘܿܢ ܫܘܼܓ݂ܠܵܢܹ̈ܐ.
ܣܲܓܸܠܘܼܢ ܗܵܕܝܼܵܐ (Register now)
ܛܲܥܹܝܡܘܼܢ ܗܵܕܝܼܵܐ
ܡܲܫܟ݂ܚܘܼܢ ܫܘܼܓ݂ܠܵܢܹ̈ܐ ܩܘܼܪܒܵܐ ܠܐܲܝܟܵܐ ܕܟܹܐ ܚܵܝܝܼܬܘܿܢ.
ܣܲܓ݂ܸܠܘܼܢ ܠܹܗ ܫܸܡܵܘܟ݂ܘܿܢ ܩܵܐ ܕܡܵܨܝܼܬܘܿܢ ܕܛܵܠܒܝܼܬܘܿܢ ܫܘܼܓ݂ܠܵܢܹ̈ܐ
ܠܸܛܠܵܒܵܐ ܫܘܼܓ݂ܠܵܢܹ̈ܐ ܒܐܘܼܪܚܵܐ ܕܩܸܢܛܪܘܿܢ ܥܲܠ ܐܸܢܬܸܪܢܹܝܬ، ܓܵܪܲܓ ܕܣܲܓ݂ܸܠܝܼܬܘܿܢ ܠܹܗ ܫܸܡܵܘܟ݂ܘܿܢ. ܐܲܝܵܐ ܚܕܵܐ ܐܘܼܪܚܵܐ ܦܫܝܼܛܬܵܐ ܝܠܵܗ̇ ܐܲܝܟܵܐ ܕܓܵܪܲܓ ܕܝܵܗܒ݂ܝܼܬܘܿܢ ܡܵܘܕܥܵܢܘܼܬܵܐ ܦܲܪܨܘܿܦܵܝܬܵܐ ܐܸܣܵܝܬܵܐ ܒܘܼܕ ܓܵܢܵܘܟ݂ܘܿܢ.
ܣܲܓܸܠܘܼܢ ܗܵܕܝܼܵܐ (Register now)
ܩܲܒܠܘܼܢ ܠܗܘܿܢ ܡܲܚܒܲܪ̈ܝܵܬܹܐ ܒܘܼܕ ܫܘܼܓ݂ܠܵܢܹ̈ܐ
ܡܸܢ ܒܵܬ݇ܪ ܕܣܘܼܓ݂ܸܠܹܐ ܝܬܘܿܢ ܫܸܡܵܘܟ݂ܘܿܢ ܒܐܘܼܪܚܵܐ ܕܩܸܢܛܪܘܿܢ ܥܲܠ ܐܸܢܬܸܪܢܹܝܬ، ܒܸܕ ܩܲܒܠܝܼܬܘܿܢ ܡܲܚܒܲܪ̈ܝܵܬܹܐ ܒܘܼܕ ܫܘܼܓ݂ܠܵܢܹ̈ܐ ܚܲܕܬܹ̈ܐ ܕܒܸܠܚܵܡܵܐ ܝܢܵܐ ܥܲܡ ܗܸܢܝܵܢܵܘܟ݂̈ܘܿܢ ܘܕܘܼܟܵܘܟ݂ܘܿܢ.
ܚܫܝܼܚܵܐ ܝܘܸܢ ܐܵܢܵܐ؟
ܩܸܢܛܪܘܿܢ ܕ Jobs Victoria ܥܲܠ ܐܸܢܬܸܪܢܹܝܬ ܡܲܓܵܢܵܝܵܐ ܝܠܹܗ ܘܦܬܝܼܚܵܐ ܝܠܹܗ ܩܵܐ ܟܠܚܲܕ ܕܛܲܥܘܼܝܹܐ ܝܠܹܗ ܒܵܬ݇ܪ ܦܘܼܠܚܵܢܵܐ، ܒܸܚܒ݂ܵܫܵܐ ܐܸܣܟܘܿܠܵܝܹ̈ܐ ܬܹܒ݂ܹܝܠܵܝܹ̈ܐ.
ܡܲܘܕܥܵܢܘܼܬܵܐ ܙܵܘܕܵܢܬܵܐ ܒܘܼܕ ܩܸܢܛܪܘܿܢ ܥܲܠ ܐܸܢܬܸܪܢܹܝܬ
ܡܘܿܕܝ݇ ܦܸܨܠܹ̈ܐ ܕܫܘܼܓ݂ܠܵܢܹ̈ܐ ܡܵܨܸܝܢ ܕܡܲܫܟ݂ܚܸܢ ܒܐܘܼܪܚܵܐ ܕܩܸܢܛܪܘܿܢ ܥܲܠ ܐܸܢܬܸܪܢܹܝܬ؟
ܟܠܲܝܗܝ ܦܸܨܠܹ̈ܐ، ܒܸܚܒ݂ܵܫܵܐ ܫܘܼܓ݂ܠܵܢܹ̈ܐ ܩܵܐ ܐ݇ܢܵܫܹ̈ܐ ܕܠܲܝܬ ܠܗܘܿܢ ܢܸܣܝܵܢܵܐ ܘܩܵܐ ܫܵܘܦܵܢܹ̈ܐ ܡܩܲܕܡܹ̈ܐ ܘܡܬܲܠܡܸܕܵܢܘܼܝܵܬܹ̈ܐ ܕܒܦܘܼܪܥܵܢܵܐ. ܬܵܡܵܐ ܐܝܼܬ ܫܵܘܦܵܢܹ̈ܐ ܓܵܘ ܚܲܕ ܡܸܢܝܵܢܵܐ ܓܘܼܒ݂ܪܵܐ ܕܐܘܼܡܵܢܘܼܝܵܬܹ̈ܐ ܒܸܚܒ݂ܵܫܵܐ ܒܲܢܵܝܘܼܬܵܐ ܘܐܲܪܚܘܼܬܵܐ ܘܣܢܵܕܬܵܐ ܕܫܲܦܠܘܼܬܵܐ ܘܓܲܢܹ̈ܐ ܥܲܡܡܵܝܹ̈ܐ ܘܦܘܼܪܓܵܝܵܐ ܘܫܘܼܠܛܵܢܵܐ ܘܡܲܒܘܼܥܹ̈ܐ ܐ݇ܢܵܫܵܝܹ̈ܐ ܘܚܘܼܠܡܵܢܵܐ ܘܢܘܼܩܵܠܵܐ ܘܡܲܩܪܲܛܬܵܐ ܕܟܵܘܣܵܐ ܘܫܘܼܦܪܵܐ ܘܙܸܒ݂ܢܵܐ ܘܙܘܼܒܵܢܵܐ ܘܩܲܘܲܡܝܵܬܹ̈ܐ ܘܬܲܓܵܪܘܼܬܵܐ ܘܬܸܩܢܘܿܠܘܿܓ݂ܝܼܵܐ ܕܡܵܘܕܥܵܢܘܼܬܵܐ ܘܪܵܕܝܼܵܬܹ̈ܐ ܘܙܘܼܒܵܢܹ̈ܐ ܘܪܵܒܵܐ ܐ݇ܚܹܪ݇ܢܹ̈ܐ.
ܐܵܢܲܢܩܵܝܬܵܐ ܝܠܹܗ ܕܣܲܓ݂ܸܠܸܢ ܠܹܗ ܫܸܡܝܼ ܗܵܕܟ݂ܵܐ ܕܡܵܨܸܝܢ ܕܛܲܥܸܝܢ ܒܵܬ݇ܪ ܫܘܼܓ݂ܠܵܢܹ̈ܐ؟
ܟܠܚܲܕ ܐ݇ܢܵܫܵܐ ܡܵܨܹܐ ܕ ܛܲܥܹܐ ܒܵܬ݇ܪ ܫܘܼܓ݂ܠܵܢܹ̈ܐ ܒܐܘܼܪܚܵܐ ܕܩܸܢܛܪܘܿܢ ܥܲܠ ܐܸܢܬܸܪܢܹܝܬ (search for jobs on the online hub). ܠܸܛܠܵܒܹܗ ܚܲܕ ܫܘܼܓ݂ܠܵܐ، ܐܵܢܲܢܩܵܝܬܵܐ ܝܠܗ̇ ܕܣܲܓ݂ܸܠܬܘܿܢ ܠܹܗ ܫܸܡܵܘܟ݂ܘܿܢ (register).
ܡܵܨܸܝܢ ܕܛܵܥܸܝܢ ܒܵܬ݇ܪ ܫܘܼܓ݂ܠܵܢܹ̈ܐ ܥܲܠ ܬܘܼܩܵܢܝܼ ܡܫܲܢܝܵܢܵܐ؟
ܗܹܐ. ܒܡܲܦܠܲܚܬܵܐ ܕܬܘܼܠܚܵܡܵܐ ܕܣܵܝܕܟܸܟܲܪ (Sidekicker app)، ܡܵܨܝܼܬܘܿܢ ܕܥܵܒ݂ܪܝܼܬܘܿܢ ܠܓܵܘ ܩܸܢܛܪܘܿܢ ܥܲܠ ܐܸܢܬܸܪܢܹܝܬ ܘܛܲܥܝܼܬܘܿܢ ܒܵܬ݇ܪ ܫܘܼܓ݂ܠܵܢܹ̈ܐ ܥܲܠ ܐܲܣܵܢܵܘܟ݂ܘܿܢ ܡܫܲܢܝܵܢܵܐ.
ܡܘܿܕܝܼ ܒܸܕ ܩܲܘܸܡ ܐܝܼܡܲܢ ܕܣܲܓ݂ܸܠܸܢ ܠܹܗ ܫܸܡܝܼ؟
- ܚܘܼܫܒܵܢܵܘܟ݂ܘܿܢ ܕܩܸܢܛܪܘܿܢ ܥܲܠ ܐܸܢܬܸܪܢܹܝܬ ܒܸܕ ܦܵܐܸܫ ܒܸܪܝܵܐ. ܡܵܨܝܼܬܘܿܢ ܕܥܵܒ݂ܪܝܼܬܘܿܢ ܠܓܵܘ ܚܘܼܫܒܵܢܵܘܟ݂ܘܿܢ ܒܟܠ ܥܸܕܵܢܵܐ ܕܗܵܘܝܵܐ ܒܢܝܼܫܵܐ ܕܒܲܠܒܝܼܬܘܿܢ ܘܕܛܵܠܒܝܼܬܘܿܢ ܫܘܼܓ݂ܠܵܢܹ̈ܐ ܘܕܚܲܕܸܬܝܼܬܘܿܢ ܠܵܗ̇ ܡܵܘܕܥܵܢܘܼܬܵܘܟ݂ܘܿܢ ܦܲܪܨܘܿܦܵܝܬܵܐ.
- ܒܸܕ ܫܲܪܝܼܬܘܿܢ ܩܲܒܘܼܠܹܐ ܐܸܓܲܪ̈ܝܵܬܹܐ ܐܹܠܸܟܬܪ̈ܘܿܢܵܝܹܐ ܒܘܼܕ ܫܘܼܓ݂ܠܵܢܹ̈ܐ ܕܒܸܠܚܵܡܵܐ ܝܢܵܐ ܥܲܡ ܕܘܼܟܵܘܟ݂ܘܿܢ ܘܗܸܢܝܵܢܵܘܟ݂̈ܘܿܢ.
ܡܘܿܕܝܼ ܝܠܵܗ̇ ܡܵܘܕܥܵܢܘܼܬܝܼ ܦܲܪܨܘܿܦܵܝܬܵܐ ܘܡܵܨܸܝܢ ܕܚܲܕܸܬܸܢ ܠܵܗ̇؟
ܚܘܼܫܒܵܢܵܘܟ݂ܘܿܢ ܕܩܸܢܛܪܘܿܢ ܥܲܠ ܐܸܢܬܸܪܢܹܝܬ ܒܸܚܒ݂ܵܫܵܐ ܝܠܹܗ ܡܵܘܕܥܵܢܘܼܬܵܐ ܦܲܪܨܘܿܦܵܝܬܵܐ ܐܲܝܢܝܼ ܕܡܲܦܠܸܚܵܢܹ̈ܐ ܟܹܐ ܚܵܙܝܼܠܵܗ̇ ܐܝܼܡܲܢ ܕܒܸܛܠܵܒܵܐ ܝܬܘܿܢ ܫܘܼܓ݂ܠܵܢܹ̈ܐ. ܡܵܘܕܥܵܢܘܼܬܵܘܟ݂ܘܿܢ ܦܲܪܨܘܿܦܵܝܬܵܐ ܝܼܠܵܗ̇ ܐܲܝܟ݂ ܚܲܕ ܟܘܼܢܵܫܵܐ ܕܢܸܣܝܵܢܵܐ ܦܘܼܠܚܵܢܵܝܵܐ (resume) ܥܲܠ ܐܸܢܬܸܪܢܹܝܬ. ܡܵܨܝܼܬܘܿܢ ܕܚܲܕܸܬܝܼܬܘܿܢ ܠܵܗ̇ ܐܝܼܡܲܢ ܕܡܵܘܕܥܵܢܘܼܬܵܘܟ݂ܘܿܢ ܦܲܪܨܘܿܦܵܝܬܵܐ ܘܢܸܣܝܵܢܵܘܟ݂ܘܿܢ ܦܘܼܠܚܵܢܵܝܵܐ ܫܲܚܠܘܼܦܹܐ ܝܢܵܐ.
ܒܸܕ ܦܵܝܫܸܢ ܡܘܼܕܥܸܝܵܐ ܐܝܼܡܲܢ ܕܫܘܼܓ݂ܠܵܢܹ̈ܐ ܚܲܕܬܹ̈ܐ ܦܝܵܫܵܐ ܝܢܵܐ ܦܪܝܼܣܹܐ؟
ܗܹܐ. ܡܸܢ ܒܵܬ݇ܪ ܕܣܲܓ݂ܸܠܝܼܬܘܿܢ ܠܹܗ ܫܸܡܵܘܟ݂ܘܿܢ ܥܲܠ ܩܸܢܛܪܘܿܢ ܥܲܠ ܐܸܢܬܸܪܢܹܝܬ، ܒܸܕ ܫܲܪܝܼܬܘܿܢ ܩܲܒܘܼܠܹܐ ܐܸܓܲܪ̈ܝܵܬܹܐ ܐܹܠܸܟܬܪ̈ܘܿܢܵܝܹܐ ܐܝܼܡܲܢ ܫܘܼܓ݂ܠܵܢܹ̈ܐ ܚܲܕܬܹ̈ܐ ܦܝܵܫܵܐ ܝܢܵܐ ܦܪܝܼܣܹܐ. ܐܸܢ ܡܲܨܠܝܼܬܘܿܢ ܠܹܗ ܬܘܼܠܚܵܡܵܐ ܕܣܵܝܕܟܸܟܲܪ (Sidekicker app) ܡܵܨܝܼܬܘܿܢ ܕܩܲܒܠܝܼܬܘܿܢ ܠܗܘܿܢ ܡܲܚܒܲܪ̈ܝܵܬܹܐ ܒܘܼܕ ܫܘܼܓ݂ܠܵܢܹ̈ܐ ܚܲܕܬܹ̈ܐ ܚܲܕܪܹܫܵܐ ܥܲܠ ܬܹܠܝܼܦ̮ܘܿܢܵܘܟ݂ܘܿܢ.
ܐܲܝܢܝܼ ܣܢܵܕܝܵܬܹ̈ܐ ܐ݇ܚܹܪ݇ܢܹ̈ܐ Jobs Victoria ܟܹܐ ܡܲܩܪܸܒ݂ܝܼ ܩܵܐ ܐ݇ܢܵܫܹ̈ܐ ܕܛܲܥܘܼܝܹܐ ܝܢܵܐ ܒܵܬ݇ܪ ܦܘܼܠܚܵܢܵܐ؟
Jobs Victoria ܟܹܐ ܡܲܩܪܸܒ݂ܝܼ ܚܸܠܡܲܬܹ̈ܐ ܦܲܪ̈ܨܘܿܦܵܝܹܐ ܩܵܐ ܐܵܢܝܼ ܒܢܲܝ̈ ܒ݂ܝܼܟܬܘܿܪܝܵܐ ܕܛܲܥܘܼܝܹܐ ܝܢܵܐ ܒܵܬ݇ܪ ܦܘܼܠܚܵܢܵܐ ܒܡܸܨܥܵܝܘܼܬܵܐ ܕܝܲܗܠܲܢ ܕܣܢܹܐܓ݂̈ܪܹܐ ܘܡܲܠܦܵܢܹ̈ܐ ܡܗܲܕܝܵܢܹ̈ܐ ܘܡܵܠܘܿܟ݂ܹ̈ܐ ܕܐܘܼܡܵܢܘܼܬܵܐ.
ܐܲܝܟܵܐ ܡܵܨܸܝܢ ܕܩܵܢܸܝܢ ܣܢܵܕܬܵܐ ܬܲܩܢܝܼܩܵܝܬܵܐ؟
ܐܸܢ ܐܝܼܬܠܵܘܟ݂ܘܿܢ ܩܸܛ̈ܪܹܐ ܬܲܩܢܝܼܩܵܝܹ̈ܐ ܐܝܼܡܲܢ ܕܡܲܦܠܘܼܚܹܐ ܝܬܘܿܢ ܩܸܢܛܪܘܿܢ ܕܥܲܠ ܐܸܢܬܸܪܢܹܝܬ، ܐܸܢ ܒܲܣܡܵܐ ܠܵܘܟ݂ܘܿܢ ܫܲܕܪܘܼܢ ܐܝܼܡܵܝܠ ܩܵܐ support@sidekicker.com.au ܝܲܢ ܩܪܹܝܡܘܼܢ ܥܲܠ ܬܹܠܝܼܦ̮ܘܿܢ ܡܸܢܝܵܢܵܐ 1800 967 909.
ܐܸܢ ܣܢܝܼܩܹܐ ܝܬܘܿܢ ܠܗܲܝܲܪܬܵܐ ܒܡܲܦܠܲܚܬܵܐ ܕܩܸܢܛܪܘܿܢ ܥܲܠ ܐܸܢܬܪܢܹܝܬ (online hub) ܐܸܢ ܒܲܣܡܵܐ ܠܵܘܟ݂ܘܿܢ ܡܲܚܒܸܪܘܼܢ ܩܵܐ ܚܘܼܛܵܐ ܫܲܚܝܼܢܵܐ ܕ Jobs Victoria ܥܲܠ ܡܸܢܝܵܢܵܐ 1300 208 575.